Оросын “The Moscow Times” сайт Монголын рэппер С.Амармандахыг Оросын элчингийн ажилтан зодсон хэргийн талаар мэдээлжээ.
Мэдээнд өгүүлснээр нэгэн баяр ёслолын арга хэмжээний үеэр үндсэрхэг үзлээрээ алдартай Амармандах Оросын зочдыг “Хай Гитлер!” хэмээн мэндэлж угтсанаас бүх зүйл эхэлсэн гэнэ.
Арга хэмжээний дараа Оросын элчингийн нэгэн ажилтан Амараад довтолж, толгойг нь лонхоор цохисон байна. Рэпперийг газарт унахад бүлэг хүмүүс ухаан алдтал нь өшигчиж зодсон гэнэ. Удалгүй хамгаалалтын ажилтнууд тэднийг салгаж байгаа нь камерт бичигдэж үлджээ.
Монголын хэвлэлүүдийн мэдээлж байгаагаар зарим нь Амарааг эрчим эмчилгээ хийлгэж, бие нь тааруу байгаа гэсэн бол зарим нь хамар нь хугарснаас өөр гэмтэлгүй байгаа гэсэн байна. Энэ талаар Улаанбаатарт суугаа ОХУ-ын элчин сайдын яамнаас тодруулахад “Бидэнд байгаа мэдээллээр бол энэ нь үндэслэлгүй цуурхал. Яагаад ийм мэдээлэл гарах болсныг шалгаж байна” гэжээ.
Эх сурвалж: The Moscow Times
