Сангийн сайд асан С.Баярцогтын Швейцарь дахь дансаар10 сая ам.долларын сэжигтэй гүйлгээ хийсэн тухай “Ройтерс” агентлаг мэдээллэсэн. Хэдийгээр сайд асан С.Баярцогт өөрөө уг мэдээллийг үгүйсгэсэн ч түүнийг “Рио тинто” компаниас хахууль авсан эсэх тухай дуулиан тасрахгүй байна. Иймд уг асуудалтай холбоотойгоор Оюутолгойн хөрөнгө оруулалтын гэрээг эргэж харах уу гэдэг талаарх улстөрчдийн байр суурийг хүргэе.
Засгийн газрын Хэрэг эрхлэх газрын дарга Г.Занданшатар:
-Оюутолгойн хөрөнгө оруулалтын гэрээг эргэж харах шаардлагагүй. Засгийн газрын зүгээс тогтвортой, ашигтай байдлыг хангаж ажиллана. “Рио тинто” компанитай ойлголцож, хамтарч ажиллаж байгаа. УИХ-аас шийдсэн учраас энэхүү гэрээг эргэж харахгүй.
Уул уурхай, хүнд үйлдвэрийн сайд Д.Сумъяабазар:
-Энэ асуудлыг хариуцаж байгаа салбарын сайдын хувьд Оюутолгойн хөрөнгө оруулалтын гэрээг өөрчлөх шаардлагагүй гэж үзэж байгаа. Гэрээнд заасан үүргээ биелүүлэх, цаашдаа үйл ажиллагааг өргөжүүлэх, бэхжүүлэх, ашиг орлогоо нэмэгдүүлэх гэсэн байр сууриар Оюутолгойн төслийг илүү дэмжинэ. Оюутолгойн төсөл бол Монголын уур уурхайн салбарт хөрөнгө оруулагчдыг татах цөм нь байсан. Цаашид үргэлжлүүлэн хэрэгжүүлэхийн төлөө хичээн ажиллаж байгаа.
МАХН-ын дарга Н.Энхбаяр:
-Оюутолгойн гэрээний дагуу ногдол ашгийг 2036 оноос хуваарилна. Байгуулснаас хойш 27 жилийн дараа ногдол ашгаа хуваарилдаг гэрээ өөр хаана ч байхгүй. Тиймээс нэн даруй гэрээг цуцлах хэрэгтэй. Оюутолгойн гэрээг цуцлахад дэлхий нийтээрээ ойлгоно. Хэн ч гайхахгүй. Тиймээс бид энэ гэрээг цуцлуулахын тулд төр засгийн удирдлагуудад шаардах бичиг хүргүүлж байна. УИХ-ын гишүүдэд маш том боломж байна.Та бүхэн Оюутолгойн гэрээг цуцалчихвал бид та нарыг дэмжих болно. Ард түмэн ч та бүхнийг дэмжинэ.
ИЗНН-ын дарга Ц.Ганхуяг:
-Засаг барьж буй намууд хэн их өр тавьдгаараа уралдаж байна. Монгол даяар тарьсан лицензүүдийг яах вэ. Монголын ард түмэн баялагтаа эзэн суух цагийг наашлуулахын эхлэл нь Оюутолгойн гэрээг цуцлах юм. Юуны өмнө Монголын ард түмний эрх ашгийг хохироосон хөрөнгө оруулалтын гэрээг байгуулах жигшүүрт үйл ажиллагаанд оролцсон, ялангуяа энэ ажиллагааг удирдан даалгавар өгсөн эрх бүхий албан тушаалтнуудыг нэг бүрчлэн шалгах, хариуцлага тооцох ёстой.
