Дэлхийн хамгийн үзэсгэлэнтэй, гоо бүсгүйг шалгаруулдаг “World Miss” буюу “Дэлхийн мисс”-ийн тэмцээн эхлэхэд нэг сарын хугацаа үлдлээ. Энэ жилийн “Дэлхийн мисс” тэмцээн АНУ-ын Вашингтон хотноо ирэх арваннэгдүгээр сарын 29-нөөс арванхоёрдугаар сарын 18-нд болно.
Тус тэмцээнд оролцох орон орны миссүүд тодорч эхэлсэн талаар тус тэмцээний албан ёсны сайтад /www.missworld.com/ байршаад эхэлжээ.
Харин Монгол Улсыг төлөөлөн оролцох миссийн нэр хараахан тодроогүй байгаа юм. Энэ талаар албаныхнаас тодруулахад “Удахгүй миссийн нэр тодорно” гэсэн хариултыг өглөө. АНУ явах багийнхан үүнийг нууцалж байгаа бололтой. Монголын гоо бүсгүйчүүдээс А.Сарнай одоогоос таван жилийн өмнө БНХАУ-д болсон “Дэлхийн мисс”-ийн тэмцээний шилдэг 25-д шалгарч байсан нь манай оролцогчдын үзүүлсэн хамгийн өндөр амжилт аж.
Энэ жил АНУ-д зохиогдох гэж буй “Дэлхийн мисс”-ийн тэмцээн нь ихээхэн анхаарал татсаар байна. АНУ-ын Ерөнхийлөгчийн сонгуульд Бүгд Найрамдах намаас нэр дэвшигч Дональд Трамп хүртэл энэхүү боломжийг алдахыг хүссэнгүй бололтой. Тэрбээр үе үеийн миссүүдийг сурталчилгаандаа тоглуулаад амжсан юм.
