УИХ-ын гишүүн О.Баасанхүүг намаасаа хөөгдсөн гэх мэдээлэл гарсан. Тэгвэл энэ талаар О.Баасанхүү гишүүн “Намайг намаас хөөсөн талаар надад мэдээлэл алга. Манай намын даргын худ фэйсбүүкт тодорхой юм бичсэн байна лээ. МАХН-аас хөөн хөөтөл нь гарахгүй. Харин МАХН-ыг шинэчилнэ. 2012-2016 он хүртэл идэж уусан, луйвардсан зүйл байвал ард түмнээс уучлал гуйна. Намын даргаа хайрлах, түүнд өрөө төлөх мэтээр зарим хүн ярьдаг. Би Н.Энхбаяр даргын өмгөөлөгч байсан. 11 хоног өлсгөлөн зарлаж байхад нь амийг нь аврах гээд Женко Баттулга дээр орж гуйгаад, Элбэгдоржийг очиж хэлээч гээд эмнэлэг рүү аваад явж байсан. Шоронд байхад нь хамгийн олон удаа очсон. Солонгост байхад нь ч хамгийн олон уулзаж, холбогдож байсан хүн нь. МАХН Ерөнхийлөгчийн сонгуульд орох ёстой гээд өөрийн төлөөллөө баттай хамгаалж байгаа. Хэнээс, юунаас урвасан байж таарах уу. Намыг шинэчилье, хариуцлага бий болгоё гэхээр урвагч болдог юм уу. Танд таалагдахгүй юм ярихаар урвалт болдог юм уу” хэмээн өөрийн цахим хуудсаар мэдэгдлээ.
