Яруу найрагч А.Эрдэнэ-Очир агсныг өнөөдөр эцсийн замд нь үдлээ. МЗЭ-ийн Удирдах зөвлөлийн дарга, СГЗ Д.Нацагдоржийн шагналт, ‘Болор цом’-ын эзэн, нэрт яруу найрагч А.Эрдэнэ-Очир талийгаачийг сүүлчийн замд нь үдэх ёслолыг Улсын дуурь бүжгийн эрдмийн театраас өнөө өглөө гүйцэтгэсэн юм. Талийгаачийг оршуулах ёслолд ар гэрийнхэн нь болон ах дүү, журмын анд найз нөхөд, МЗЭ-ийн удирдлага, яруу найрагчид гээд бүгд цугласан байв. Төрийн соёрхолт, СГЗ, зохиолч Д.Төрбат ‘Эвий муу дүү минь ижийгээ амьдад үхэж болохгүй, ижий минь цээжиндээ наргүй болно’ гэж бичиж явлаа. Тэр сайхан яруу найрагч үгүй болсноор бид ч цээжиндээ наргүй болох шиг болов. Уран цэцэн санаа урсаж ундарч байдаг уран зохиолын ертөнцийн нэгэн гэрэлт авьяас билиг бид бүгдэд ‘Гэнэн шувууд’, ‘Сэтгэл тунгалагших намар’, ‘Миний цуглуулсан хорвоо’ зэрэг тостой гараар баримгүй хэдэн сайхан ном үлдээгээд одлоо’ хэмээжээ.
