Алтай холдинг групп энэ жил Монголын өргөн хэрэглээний бүтээгдэхүүний худалдааны сүлжээнд цоо шинэ стандарт бүхий И-Март дэлгүүрийг зах зээлд танилцуулж богино хугацаанд олон үйлчлүүлэгчтэй болоод байгаа билээ. Тус группын ТУЗ-ийн даргаар Батболдын Баттүшиг мөн энэ жилээс ажиллаж эхэлсэн.
Алтай холдинг групп нь Чингис хаан зочид буудал, Алтай кашмир, И-Март, Стар HD телевиз зэрэг бизнесийн олон төрөлд үйл ажиллагаагаа явуулж байгаа билээ.
Тэгвэл үүрэн холбооны салбарын анхдагчдын нэг Скайтел группыг Алтай холдинг болон Шунхлай групп хамтран эзэмшдэг ба тэд удирдлагын багийн шинэ томилгоог өнгөрсөн долоо хоногт хийсэн байна.
Тодруулбал, Скайтел группын ТУЗ-ийн даргаар ажиллаж байсан П.Батсайханы оронд Б.Баттүшигийг томилж харин Гүйцэтгэх захирлаар нь ажиллаж байсан Д.Болор ажлаа хүлээлгэн өгчээ. Д.Болор захирлын оронд Скайтелийн Тэргүүн дэд захирал Д.Нарантуяаг захирлын үүрэг гүйцэтгэгчээр томилжээ.
Скайтел групп үүрэн холбооны салбарт зах зээлийн 14.5 хувийг эзэлж байна.
Давхардсан тоогоор 3.1 сая хэрэглэгчтэй болсон Монголын үүрэн холбооны салбархэрэглэгчийн хувьд аль хэдийнээ ханаж өсөлт саарч байгааг салбарын тоглогчид болоод ажиглагчид онцолдог.
Дата хэрэглээний цоо шинэ орчинд оператор компаниудын бизнес мөн л цоо шинэлэг арга барилаар ажиллах сорилт тулгараад байгаа билээ.
