Ерөнхий сайд Ж.Эрдэнэбат амралтын өдрүүдэд Өмнөговь аймагт ажилласан. Тэрээр Оюутолгойн уурхайд ажилласны дараа Тавантолгойн нүүрсний ордын бассейнд үйл ажиллагаа явуулж буй компаниудын захирлуудтай уулзлаа.
Эрдэнэс-Тавантолгой, Энержи ресурс, орон нутгийн Тавантолгой компаниуд олборлолт явуулж, бүтээгдэхүүнээ экспортолж байна.
Ерөнхий сайд Ж.Эрдэнэбат эдгээр гурван компанийн удирдлагуудын тайлбарыг сонссоны дараа үүрэг өглөө. Ерөнхий сайд Ж.Эрдэнэбат:
-Хэн олборлож байгаагаас үл хамаараад Тавантолгойн нүүрс бүхлээрээ Монголын ард түмний өмч. Ашгийг нь улсаараа, ард түмнээрээ хүртэх ёстой. Гэтэл олборлолт явуулж байгаа гурван компани хоорондоо үл ойлголцон, бие биеийнхээ үнийг унагаж хэдэн жил явлаа. Үүний уршгаар нүүрсний экспорт Монгол Улсад ашиггүй, нөгөө талдаа ашигтай байна. Энэ байдлаа цэгцэл, гурван компани хоорондоо хямд үнээр өрсалдөх бус, гурвуулаа нийлж “Монгол нүүрс” гэдэг нэг брэндээр гадныхантай өрсөлдөх ёстой. Үүний тулд бүгд нүүрсээ баяжуулаад гаргадаггүй юм гэхэд дотооддоо нэг ам, нэг үнэтэй байх хэрэгтэй.
Одоо ойлголц, нэг бодлого, нэг үнэтэй бол, тэр саналыг чинь Засгийн газар төрийн шийдвэр болгоё. Та нарт тодорхой хугацаа өгье. Энэ хугацаанд ойлголцож нэгдэж чадахгүй бол нүүрсний экспортын нэг цонхны бодлого, ялангуяа үнийн зохицуулалтад төр оролцож эхэлнэ гэдгийг хатуу хэлье. Дахиад хэлье, төр, хувийн хэвшлийн хэн нь олборлож байгаагаас үл хамааран Тавантолгойн нүүрс Монголын ард түмний баялаг. Үнэ нь зах зээлийнхээ зарчмаар, зохицуулалт нь баялгийн нийт эзний эрх ашигт нийцэх ёстой гэв.
Ерөнхий сайд Ж.Эрдэнэбат Өмнөд хилийн Гашуунсухайт боомтод мөн ажилласан юм.
